خەتكۈش بويىچە ئارخىپلار: شىئىر

ئىنگىلىز تىلى ئۆگۈنەيلى

ئەسسالامۇئەلەيكۇم، بلوگنىڭ قەدىرلىك كونا-يېڭى، چوڭ-كىچىك، قېرى-ياش… ئوقۇرمەنلىرى.  قانداق ئەھۋالىڭلار؟ بەلەن-ئوبدان تۇرۇشتۇلىمۇ؟

يازمىنىڭ تېمىسىنى كۆردۈڭلار ھەقاچان. نېمە دېمەكچى بولغانىلىقىمنىمۇ بىلىپ بولدۇڭلار. (ئەقىللىق،ھۇششار تور پۇخرالىرى-دە، ھەممىڭلار. ھى..ھى…) گەپنىڭ ئۆزىگە كەلسەم، بلوگچىلىققا كىرىپ لاغايلاپ يۈرگىلىمۇ ئۇزۇن يىل بولۇپتۇ (گەرچە پىشقەدەملەر سېپىگە تېخى كىرمىگەن بولساممۇ). ئۇنى-بۇنى يېزىپ دوستلار بىلەن ئورتاقلاشقان بولدۇم. بلوگ يېزىپ يۈرۈپ، ئالىي مەكتەپنىمۇ پۈتتۈرۈپ بولۇپ، ئۆرلەپ ئوقۇش ئۈچۈن تىرمىشىپ يۈرۈپتىمەن. مۇشۇ جەرياندا مەن ئەپسۇسلىنىدىغان بىر ئىش بولسا، تور پۇخرالىرىنىڭ تۇيۇقسىز ئازىيىپ، بۇرۇنقى پىشقەدەم بلوگلارنىڭ بىر-بىردىن غايىپ بولۇپ كېتىشى ۋە ماڭا ئوخشاش يېڭىياچىلارنىڭمۇ يا بلوگنى تاشلىيالماي، يا قاملاشتۇرۇپ بېرەر نەرسە يازالماي ( ئاچچىقىڭلارغا ھاي بېرىڭلار..ئۆزۈمنىلا دەۋاتىمەن جۇمۇ بۇ يەردە… كۆز قىسقان چىراي ئىپادىسى) ئارىسالدىلىقتا يۈرىشىمىز. شۇنداق بولىشىغا قارىماي تولۇق ئوتتۇرا مەكتەپتە چىرماشقان بۇ تور ۋە يېزىقچىلىق ئىشتىياقىنىڭ تۈرتكىسىدە بلوگنىمۇ تاشلىماي، ئايدا-يىلدا بىرەر قېتىم بولسىمۇ ئۇ يەر- بۇ يەرلىرىنى ئۆزگەرتىپ بېقىپ، بەزىدە بىر نەرسىلەرنى يېزىپ بېقىپ تور دۇنياسىدا لاغايلاپ يۈرىۋاتىمەن.

ئالىي مەكتەپتە ئىنگىلىز تىلىنى كەسىپ قىلىپ ئۆگەنگەن بوپتىمەن. (گەرچە ماڭا مەجبۇرىي تېڭىلغان بىر كەسىپ بولسىمۇ. ئەمما لېكىن، خېلى ئوبدان ئۈگەنگەن جۇما… ماختىنىۋالاي ئازراق بولسىمۇ… ھا..ھا..) بۇرۇن تولۇق ئوتتۇرىنى ئۇيغۇرچە (شۇنچىلىك سېغىنىمەن ئۇيغۇر تىلىدا دەرس ئاڭلاشنى. بۇ مەزگىل مەن ئەڭ سۆيۈنۈپ ۋە پەخىرلىنىپ تۇرۇپ تىلغا ئالىدىغان بىر گۈزەل ئەسلىمەم ۋە كەلگۈسىدە قايتىدىن بەرپا قىلماقچى بولغان بىر غايەم) ئوقۇغان ئىدىم. ئۇ چاغلاردا بىزگە ئىنگىلىزچە دەرس يوق ئىدى. شۇ ۋەجىدىن ئالىي مەكتەپتە ھەممىنى نۆلدىن باشلاشقا توغرا كەلدى ۋە خېلى (ئۈچ-تۆت قېتىم تەكرار ئوقۇڭ بۇ خەتنى) قىينالدىم. ئەمما ئاخىرىدا نەتىجىسى چىقتى ۋە ئىككى يىلنىڭ ياقى مۇشۇ كەسىپنىڭ سۈيىدە ئېقىپ، ئوتىدا كۆيۈپ (ئېقىپ كەتمەي، كۆيۈپ كۈل بولماي، ھى…ھى..) ئۆز نېنىمنى تېپىپ يەپ كېلىۋاتىمەن. ئەجەپ ھېكايە سۆزلەپ كېتىپتىمىنا… نەق گەپنىڭ ئۆزىگە كېلەي:

شۇ ئۈگەنگەن نەرسىلەرنى تور پۇخرالىرىغا ئازراق بولسىمۇ يەتكۈزەي دېگەن بىر تەمەننادا بلوگدا “ ئىنگىلىزچە ئۆگۈنەيلى “ سەھىپىسىنى ئاچتىم. قۇربۇمنىڭ يېتىشىچە، ئاز ۋە ساز بىر شەكىلدە ئىنگىلىز تىلىدىن دەرس بىرىشكە ئورۇنۇپ باقماقچىمەن. ئەگەر سىز ئىنگىلىز تىلىنى ياخشى بىلسىڭىز، بىلگەنلىرىڭىزنى بىزلەردىن ئايىماڭ؛ ئەگەر بىلمىسىڭىز ۋە ئۆگۈنۈشكە قىززىقسىڭىز ياكى ئۆگەنسەم بولۇتتى مىنە دەيدىغان دوستلىرىڭىز بولسا ”ئىنگىلىز تىلى ئۆگۈنەيلى“ سەھىپىمىز سىزلەرنى ھەر ۋاقىت قارشى ئالىدۇ.

قېنى مەرھەممەت


ئەرسكەرتمە: بۇنىڭدىن كېيىن ئىنگىلىز تىلى دەرسلىكىمىز ھەققىدە چۈشەنمىگەن يەر بولسا مۇشۇ يازمىغا ئىنكاس يېزىش شەكلىدە سورىسىڭىز بولىدۇ. دېمەك، بۇ بىر سۇئال-جاۋاپ ۋە بىلگەنلىرىمىزنى ئورتاقلىشىدىغان بىر يازما. 

يولۇچى Traveler

شاد-شادىمان يۈرۈيدۇ بىرى

ھەسرەتا! ئەجەپ يوقمىدۇ غېمى.

غەملەر نېمە؟

بىلمەي تۇرۇپ ئىچىڭدىكىنى،

«غەملەر» دېمە

ئورۇنسىزلا غەملەر يىمە

بىلگۈچىدۇر بىرلا خۇدا

ئىچىدىكىنى، ئىچىڭدىكىنى.

كىم بىلىدۇ قەلب قەسىرى

سېغىنىش دېڭىزىنىڭ ئاجىز ئەسىرى

نەچچە يېقىلىپ، نەچچە سېلىنىپ

تۇرار بەردەم، تاشماس سەبىرى.

ئىرادىلەر دولقۇنلىرىدا

ئۈزۈپ يۈرىيدۇ

كۈندە، تۈندە رەت رەت چايقىلىپ،

سېغىنىشنىڭ ئاپتاپلىرىدا

بەس! چېقىلىپ، يەنە چېقىلىپ،

ئۆرتىنىدۇ، پۇچلىنىدۇ

ئۆزى بىلەن كۈرەش قىلىدۇ

تىلەكلىرى رەڭ بوپ ئاقىدۇ

بەك ناتۇنۇش زىمىن كۆزىگە

ئىمىر-چىمىر خەتلەر ئويىدۇ

قەغەزلەرنىڭ ئاپئاق يۈزىگە.

كۈلۈپلا يۈرەر

يەتتىنجى ئاسماندىن تەسەللىي ئىزدەر

چاندۇرماس پەقەت روھسىزلىقىنى

ئاتەش كەبى ۋىسالسىزلىقنى

بىردىن ئۆزگىگە.

راھەتلىنىپ كېلەر ئۆزىگە:

ئۇ يولۇچى، ئۇ سورالغۇچى

قىلغىنى كۆرە جازا ئالغۇچى

ۋىسالىغا ئاخىر يەتكۈچى.

2016- يىلى 10- ئاينىڭ 13- كۈنى

تىۋىش

مارت 12, 2016

قايتىش

قىپقىزىل گۆش كىچىك قۇش بولۇپ
تۇغۇلۇپ قالسام ئىدىم ناۋادا قايتا…

مۇمكىن ئەمەس
تۇغۇلغان سەن تۈمەن مىڭ يىللار ئىلگىرى
زەرىچە تۇغۇلغان ئاشۇ دەقىقىلەردە.
ئۆزى تۇرىۋاتقان يەردىن ھەيرەت ئىچرە تۇرۇپ قالمىغان
چۈشۈممۇ بۇ دەپ گۇمان ئىسكەنجىسىگە چۈشمىگەن
يۈزلىرىدىكى قاپقارا لايلارنى
قاپقارا لاي قوللىرى بىلەن ئېرتىۋېتىپ
”نۇر“ نى كۆرۈپ، كۈلۈمسىرىگەن ئادەمنىڭ چىھرىدە.

گۆش بولۇپ ئۈسكەن سەن شۇنداق كۈنلەردە
ئەڭ سۈيۈملۈك بىر كىشى-
ئاياقلىرى جەننەت ئاچقۇچى
رازىلىقى دوزاق ياپقۇچى-
ئېغىر قورسىقىنى كۆتۈرۈپ
تىرىكچىلىك يۆلەكچىلىرى
زۇۋانسىز ئەمما مۆئمىن ھايۋانلارنىڭ رىسىقىنى ئىزدەپ،
خان يايلىقى دېگەن يەرلەردە
ساۋاتسىز باشلىقلارنىڭ قولىغا مىڭ قاراپ
ئىسسىقلاردا چېقىلىپ، تەرلىنىپ
بىر پارچە زەيكەش يەرنىڭ ئېگىسى بولغان ئاشۇ دەملەردە.

جىسمىڭ قوشۇلدى روھىڭغا بەلكىم
نەچچە تۈمەن مىڭ يىللاردىن كېيىن
ئەمما بىلمەيتتىڭ
دۇنياغا كېلىش قانداق مۆجىزە.
خەۋەرسىز ئىدىڭ
ياشاش دېمەك كۆيۈش دېمەك
بىراۋلارنى، قايسى بىر ئىدىيەلەرنى سۆيۈپ قالاتتىڭ
ئۆزۈڭدىن خەۋەرسىز، ئۆزگىلەر بىلەن بولۇپ كېتەتتىڭ؛
ياشاش دېمەك تاللاش دېمەك
ئەمما ياشايتتىڭ
بىر ئۆمۈر تاللاشلارنىڭ شاھى ئەمەس تاللىنىشنىڭ قۇلى بولۇپ
كۈچلۈك شاماللارغا مەيلىڭنى بېرىپ؛
ياشاش دېمەك غەۋغا كۆتۈرۈش
ئەمما غەۋاغالىرىڭ باشقىلارنىڭ ئارامىنى بۇزسا بۇزاتتىكى
ئۆز ئارامىڭنى بۇزالمايتتى، توساقلاردىن ئاشالمايتتى
ئاجىزلارغا، ساڭا ئەڭ سۆيۈملۈك كىشىلەرگە كۈچى يېتەتتى-يۇ
ئۆزۈڭگە، نەپسىگە كەلگەندە كۈچسىز
سەپسەتە ئۈچۈن يانتاياق، ھەقىقەت ئۈچۈن ئۇرتوقماق ئېلىپ؛

ياشاش دېمەك ئۆلۈش دېمەك
ئەمما ياشايتىڭ مەڭگۈ ئۆلمەيدىغاندەك
روھىيىتىڭ چاك-چاك يېرىلىپ.
ئەمما قايتىش ئوچۇق ھەقىقەت.